AKENKAN A EDI KAN (FIRST READING)
Akenkan a efiri Odiyifoɔ Yesaia Nhoma no mu 2:1-5
Asɛm a Amos ba Yesaia hunuu no Yuda ne Yerusalem ho nie: Na nna a ɛdi akyire no mu no, Awurade fie bepɔ no bɛtim hɔ ataa mmepɔ atifi, na wɔama so asene nkokoɔ nyinaa, na amanaman nyinaa asene yuu aba ho. Na aman pii bɛkɔ akɔka sɛ: Mommra mma yɛnkɔ Awurade bepɔ so nkɔ Yakob Nyankopɔn fie, na ɔnkyerɛ yɛn n’akwan, na yɛnnante n’atempɔn so: Na Sion na mmara bɛfire, na Awurade asɛm afiri Yerusalem.
Na ɔbɛbu amanaman no ntam atɛn, na ɔbɛdi nnipa bebree ntam asɛm, na wɔde wɔn nkrantɛ abobɔ nsɔ, ne wɔn mpea ayɛ aderɛ. Ɔman bi remmma afena so ntia ɔman foforɔ, na wɔrensua akodie bio. O, Yakob fie, mommra mma yɛnkɔ, na yɛnkɔnante Awurade hann mu.
Nea Nyame se ni.
Gyeso Nnwom (Responsorial Psalm) Nnwom 121(122): 1-4, 8-9 G. 1
G/: M’ani gyee sɛ wɔsee me sɛ: Ma yɛnkɔ Awurade fie
- M’ani gyee sɛ wɔsee me sɛ:
Ma yɛnkɔ Awurade fie.
Yɛn nan bɛgyina
w’aponkɛseɛ mu, Yerusalem. G/. - Yerusalem a wɔakyekyere no sɛ kuro
a ɛtoatoam yie.
Ɛhɔ na mmusuakuo no nante ko,
mekyerɛ Awurade mmusuakuo. G/. - Me nuanom ne me mfɛfoɔ nti
mɛka sɛ asomdwoeɛ ntena wo mu.
Awurade yɛn Nyankopɔn fie nti
mɛhwehwɛ papa mama wo. G/.
AKENKEN A ƐTO SO MMIƐNU (SECOND READING)
Akenkan a efiri Ht. Paulo Nhoma a ɔkyerɛw kɔmaa Romafo no mu 13:11-14
Anuanom, monim ɛberɛ no, sɛ dɔn a mofiri nna mu sɔreɛ no anya adu, na afei yɛn nkwagyeɛ abɛn akyɛne berɛ a yɛdanee gyidifoɔ no. Anadwo akɔ n’anim, adekyeeɛ abɛn; enti momma yɛnyi sum mu nnwuma ngu, na yɛnhyɛ hann akodeɛ. Momma yɛnnante fɛfɛɛfɛ, sɛdeɛ ɛfata hann, ɛnyɛ agobɔne ne nsaborɔ mu, ɛnyɛ adwamammɔ ne ahohwie mu, ɛnyɛ ɔko ne nitan mu; na mmom monhyɛ Awurade Yesu Kristo sɛ atadeɛ, na mommma kwan mma ɔhonam akɔnnɔ nni mo so!
Nea Nyame se ni.
Ayeyi Dwom (Gospel Acclamation)
Alleluia! Alleluia! Nnwom 84(85):8
Awurade, ma yenhu w’adɔe na fa wo nkwagye ma yɛn
Alleluia! Alleluia!
ASƐMPA (GOSPEL)
Asɛmpa no sɛnea Ht. Mateo Kyerɛw mae 24:37-44
Yesu see n’asuafo no sɛ: “Sɛneɛ Noa nna no yɛe no, saa ara nso na Onipa ba no ba bɛyɛ. Na sɛneɛ nna a ɛdi nsuyire no mu wɔdidiiɛ na wɔnomeeɛ, wɔwareeɛ na wɔmaa awadeɛ de kɔsii da a Noa hyɛnee adaka no mu, na wɔanhunu de kɔsii sɛ nsuo bɛfaa wɔn nyinaa kɔeɛ no, saa ara nso na Onipa ba no ba bɛyɛ. Ɛnna nnipa baanu a wɔwɔ afuo mu, wɔbɛfa ɔbaako na wɔagya koro no. Mmaa mmienu a wɔreyam owiyammoɔ soɔ, wɔbɛfa ɔbaako na wɔagya koro no.
Enti monwɛn, ɛfiri sɛ monnim da ko a mo wura bɛba. Na monhunu yei sɛ efiewura no nim ɔdasuo ko a owifoɔ bɛba a, anka ɔbɛwɛn, na wamma wɔammɛtu ne dan ase amma mu. Yei nti monsiesie mo ho nsie, ɛfiri sɛ dɔn a monnwene ho no mu na Onipa ba no reba.
Nea Awurade se ni.
