MASS READINGS (TWI) AWURADE ASUBO(THE BAPTISM OF THE LORD) by Rev. Fr Stephen Kofi Sakpaku

AKENKAN A EDI KAN (FIRST READING)
Akenkan a efiri Odiyifoɔ Yesaia Nhoma no mu 42:1-4, 6-7

Hwɛ, m’akoa a mehyɛ no mpamden nie, deɛ mayi no a me kra ani sɔ no; mede me honhom magu ne so; ɔde atemmuo bɛfiri akɔ amanaman mu. Ɔrenteam na ɔremma ne nne so, na ɔremma wɔnte ne nne abɔntene so; demmire a ayɛ mmerɛ no, ɔremmu mu, na kanea mu asaawa a ɛrefiri wisie no, ɔrennum; nokorɛ mu na ɔbɛyi atemmuo adie. N’asɛm ano rennwo, na ɔrempa aba de bɛkɔ akɔsi sɛ ɔde atemmuo tenenee bɛsi asase soɔ, na mpoano aman bɛtwɛn ne mmara.

Me, Awurade, mafrɛ wo tenenee mu, na masɔ wo nsa, na makora wo, na mede wo mayɛ ɔman apam ne amanaman hann sɛ: “Bue ani a afira, yi apokyerɛfoɔ firi afiase
ne wɔn a wɔtete sum mu firi nneduadan mu.”

Nea Nyame se ni.

Gyeso Nnwom (Responsorial Psalm) Nnwom 28(29): 1-4, 9- 10 G. 11
G/: Awurade de asomdwoeɛ bɛhyira ne man.

1. Mo ɔsoro asafo, momfa animuonyam mma Awurade,
   momfa animuonyam ne tumi mma Awurade.
   Aane, monhyɛ Awurade din animuonyam,
   monsɔre Awurade, ahokeka kronkron mu. G/.
2. Awurade nne wɔ nsuo so,
   animuonyam Nyankopɔn ma aprannaa bom,
   Awurade wɔ nsuo bebree so.
   Awurade nne mu yɛ den sɛ,
   Awurade nne mu wɔ animuonyam. G/.
3. Awurade nne ma aforoteɛ ko awoɔ, na ɛma kwaeɛ mu da hɔ,
   na n’asɔrefie mufoɔ nyinaa ka sɛ: Animuonyam nka Nyankopɔn.
   Awurade tenaa ase wɔ nsuo a ayiri so,
   na Awurade bɛtena hɔ sɛ ɔhene daa. G/.

AKENKEN A ƐTO SO MMIƐNU (SECOND READING)
Akenkan a efiri Asomafoɔ Nhoma no mu 10:34-38

Na Petro buee n’ano kaa sɛ: “Nokorɛ mu na mahunu sɛ Onyankopɔn nhwɛ onipa anim, na mmom ɔman biara mu deɛ ɔsuro no, na ɔyɛ ade tenenee no, ɔpɛ sɛ ɔgye no. Sɛdeɛ asɛm a ɔde brɛɛ Israel mma berɛ a ɔnam Yesu Kristo so kaa asomdwoeɛ ho asɛmpa no teɛ no; ɔno ne nnipa nyinaa wura. Mo ara monim asɛm a asubɔ a Yohane kaa ho asɛm no akyi, ɛfirii aseɛ Galilea na ɛbaa Yudea nyinaa no, Yesu a ɔfiri Nasaret, sɛdeɛ Onyankopɔn de Honhom Kronkron ne tumi sraa no, na ɔkyini yɛɛ yie, na ɔsaa wɔn a ɔbonsam hyɛɛ wɔn soɔ no yadeɛ, ɛfiri sɛ Onyankopɔn ka ne ho.”

Nea Nyame se ni.

Ayeyi Dwom (Gospel Acclamation)
Alleluia! Alleluia! Marko 9:7
Na mununkum bi ba bɛkataa wɔn so, na ɛnne bi firi mununkum no mu kaa sɛ: Oyi ne me dɔba, montie no.
Alleluia! Alleluia!

ASƐMPA (GOSPEL)
Asɛmpa no sɛnea Ht. Mateo Kyerɛw mae 3:13-17

Yesu firi Galilea baa Yordan ho, Yohane nkyɛn sɛ ɔmmɔ no asu. Na ɔno deɛ, ɔsii no kwan sɛ: “Me mmom a ɛhia me sɛ wobɔ me asu no na woreba me nkyɛn yi?” Na Yesu bua see no sɛ: “Seesei deɛ, ma ho kwan; na ɛnam yei so na yɛhyɛ tenenee nyinaa ma.” Ɛnna ɔmaa no kwan. Na wɔbɔɔ Yesu asu wieeɛ no, ɔfirii nsuo no mu, hwɛ, ntɛm ara na ɔsoro bue maa no, na ɔhunuu Nyankopɔn Honhom sɛ ɛresiane sɛ aburuburo ba ne soɔ. Na hwɛ, ɛnne bi firi soro kaa sɛ: “Oyi ne me Dɔba a ɔsɔ m’ani.”

Nea Awurade se ni.